سياسة الخصوصية وشروط الاستخدام

آخر تحديث: 13 تشرين الأول 2026

مين نحنا

«وصلني» تطبيق بيوصل الركاب بسائقين بيقدّموا خدمة النقل بسياراتهن الخاصة، وبسيارات مكاتب التكسي الشريكة، داخل سوريا. هالصفحة بتشرح شو البيانات اللي منجمعها، وليش، ومين بيشوفها، وكيف فيك تحذفها.

المسؤول عن بياناتك: «وصلني» علامة تجارية تملكها وتشغّلها شركة زودني (Zawdni)، والسجل التجاري باسمها. شركة زودني هي الجهة المسؤولة عن معالجة البيانات (مسؤول المعالجة) بكل خدمات وصلني، وهي الطرف بالعقود مع السائقين ومكاتب التكسي.

شو البيانات اللي منجمعها

للراكب: رقم الموبايل والاسم، ونقاط الركوب والوصول والوقفات لكل رحلة، والحجوزات المسبقة وحجوزات المطار (مع رقم الرحلة الجوية والاسم عاللوحة إذا كتبتهن)، وحجوزات الاستئجار والعقود الموقّعة، والتقييمات، والرسائل اللي بتبعتها للدعم أو عن غرض منسي.
المحادثة بالرحلة: الرسائل بينك وبين السائق، منحفظها لحتى نقدر نراجع أي شكوى.
المحفظة والخصومات: رصيدك وحركاتو، وأكواد الخصم والدعوة اللي استعملتها، ومين دعاك.
تقييم الراكب: السائق بيقيّم الراكب بعد الرحلة، والتقييم بيبين للسائقين بعدين.
للسائق: الاسم والرقم الوطني والعنوان، وصورة شخصية، وصور الهوية وشهادة السواقة وأوراق السيارة، ومعلومات السيارة، وموقعه الجغرافي وهو «متصل» أو بالرحلة، وسجل الرحلات والعمولات، والعقد الموقّع.
لمكاتب التكسي: اسم المكتب وصاحبه ورقم الرخصة والعنوان، وصور الرخصة والسجل التجاري وهوية صاحب المكتب، وأرقام موظفي المكتب، وسجل رحلات سواقين المكتب وحسابو مع وصلني، والعقد الموقّع.
للجهاز: رمز الإشعارات حتى نوصّلك تنبيهات الرحلة، ولغة التطبيق. الإشعارات بتمرق عن طريق خدمات آبل وجوجل (Apple Push وFirebase Cloud Messaging).
عالجهاز بس: «البيت» و«الشغل» وآخر الأماكن اللي اخترتها بينحفظو على موبايلك، وما بيوصلونا، وبينمسحو لما تسجّل خروج أو تحذف حسابك.

ليش منستعملها

لنربطك بأقرب سائق ونحسب الأجرة ونعرض مكان السيارة وقت الرحلة.
للتحقق من هوية السائقين وصلاحية أوراقهن قبل تفعيل حساباتهن، حفاظاً على سلامة الركاب.
لحساب العمولات والتسويات مع السائقين.
لمعالجة الشكاوى والأغراض المنسية والمشاكل.

ما منبيع بياناتك لحدا، وما منستعملها للإعلانات.

مين بيشوف شو

السائق بيشوف اسم الراكب الأول ومكان الركوب والوصول، ورقم موبايلو بس بعد ما يقبل الرحلة ولحد ما تخلص.
الراكب بيشوف اسم السائق وصورتو وتقييمو وسيارتو ولوحتها ورقمو بعد قبول الرحلة.
أوراق السائقين ما بيشوفها غير فريق المراجعة بوصلني.
مكتب التكسي بيشوف الطلبات القريبة من سواقينو (بدون رقم الراكب)، ومواقع وحالة سواقينو هو بس، ورحلاتهن وحسابو. رقم الراكب بيوصل بس للسائق يلي قبل الرحلة.
مواقع السائقين للعامة بتبين على الخريطة بلا أسماء وبدقة تقريبية.
إذا شاركت رابط تتبّع رحلتك، اللي معو الرابط بيشوف حالة الرحلة، واسم السائق الأول وسيارتو ومكانها وقت الرحلة بس. الرابط بيوقف بعد ساعة من آخر الرحلة.
مكتب الاستئجار بيشوف حجزك عندو والعقد والضمانات اللي قدّمتها، لحتى يسلّمك السيارة.

الموقع الجغرافي

تطبيق الراكب بيطلب موقعك ليحدد مكان الركوب، وفيك تختار المكان يدوياً عالخريطة بدالو. تطبيق السائق بيبعت الموقع بس وهو «متصل» أو بالرحلة، وبيوقف لما يطفّي استقبال الطلبات.

الحماية

البيانات محفوظة بخوادم مشفّرة، وما في حدا بيوصل لقاعدة البيانات مباشرة من التطبيق. كل طلب بيتحقق من جلستك على الخادم. رموز الدخول بتنتهي بعد 5 دقايق.

حذف الحساب

فيك تحذف حسابك من جوّا التطبيق: القائمة ← حذف الحساب (أو من صفحة حذف الحساب). الحذف نهائي ومباشر، وبيمسح:

اسمك ورقمك وجلساتك ورموز الإشعارات.
أوراقك (للسائق) وملف السواقة (للاستئجار).
عناوين الرحلات والوقفات والملاحظات، والمحادثات بالرحلات، وتفاصيل الحجوزات ورقم الرحلة الجوية.
نصوص رسائل الدعم والأغراض المنسية، ورابط التتبّع، وكود الدعوة تبعك.
الأماكن المحفوظة على موبايلك.

اللي بيضل، بلا اسمك ولا رقمك: الرحلات كأرقام (التاريخ والأجرة ومنطقة تقريبية)، وحركات المحفظة والعمولات، والعقود الموقّعة. هدول مطلوبين قانونياً ومحاسبياً. إذا كنت سائق وعليك عمولة، لازم تسدّدها أول. وإذا عندك حجز مفتوح (مسبق أو مطار أو استئجار)، لازم تلغيه أول.

شروط مختصرة

الأجرة بتتحدد بالتطبيق قبل الطلب، وبتندفع كاش للسائق.
السائقين مقدّمي خدمة مستقلين بموجب عقد موقّع مع شركة زودني (مشغّلة وصلني)، ومسؤولين عن سياراتهن وقيادتهن. سواقين مكاتب التكسي بيشتغلوا تحت عقد المكتب، والمكتب مسؤول عنهن وعن سياراتو.
منقدر نوقف أي حساب بيسيء الاستخدام أو بيعطي معلومات غلط.

التواصل

لأي سؤال عن خصوصيتك: راسلنا على info@zawdni.com، أو من التطبيق ← المساعدة والشكاوى. الطلبات بتوصل لشركة زودني (Zawdni) بصفتها المسؤولة عن البيانات. صفحة الدعم.

وصلني علامة تجارية لشركة زودني · by Zawdni